Somos munches les persones de Xixón que, desque se torgó’l tráficu n’El Muro de la playa de San Llorienzo por motivos sanitarios, disfrutamos de la humanización d’esti llugar tan señeru. La poca densidá de tráficu fizo d’esti espaciu públicu un llugar más amable, llimpiu de fumu y ensin malpenes ruiu, que permite y estimula un usu más saludable y centráu nes persones.
Güei, n’El Muro ye posible andar, correr, patinar, desplazase en bicicleta y tamién en coche, y nun ye namás un sitiu de pasu, sinón qu’invita a quedar a socializar y disfrutar ellí cola reciella, los mayores, les amistaes, families y vecindá. En xeneral volvióse un Muro más afayadizu pa too Xixón, independientemente del nivel social o capacidaes físiques.
Fuera de consideraciones estétiques, valoramos el costu baxu que tuvo y lo cenciella que foi la implantación inicial. Sabemos que podía ameyorase y entendemos que ye lo que se busca dende’l gobiernu municipal, con un proyectu nuevu que yá presentaron. Y tamién comprobamos que cumplió la so función en tiempu record y yá vamos disfrutando de los beneficios tan claros que tien. Nun queremos una vuelta atrás.
La nuestra ciudá ye, por desgracia, una de les más contaminaes d’España y ta camín de ser una de les más contaminaes d’Europa. Hai estudios epidemiolóxicos abondos que rellacionen la polución atmosférica con muertes prematures y ingresos hospitalarios bien altos. Necesitamos atender a los criterios técnicos y científicos que nos vienen encamentando contra problemes ambientales y sociales mui graves.
Los más de los desplazamientos ente barrios en Xixón fáense andando, vivimos nuna ciudá afayadiza en distancies, sicasí’l tráficu representa un usu escomanáu del espaciu públicu en rellación al dedicáu a peatones o otres formes de desplazamientu más sostenibles. Estudios y diagnósticos de recién indiquen que la falta d’espacios públicos y verdes en Xixón ye cosa urxente. Otres ciudaes yá normalizaron estos cambios p’ameyorar la calidá de vida de persones, comerciu y mediu ambiente, como manda la Llei de Cambiu Climáticu y Transición Enerxética nueva y otres midíes vinculaes a los fondos europeos, énte les cuales tenemos, amás de derechos, obligaciones que cumplir.
A quien defendemos la permanencia del Cascayu y apoyamos esti manifiestu, axúntanos el deséu d’una ciudá más prestosa, onde los vehículos nun seyan el centru de la planificación urbana. Espacios como esti, contribuyen a tener un Xixón modernu, menos contamináu, más cohesionáu y saludable.
Si El Muro vuelve a abrir al tráficu, diba ser un retroceso bien claru que nun entendemos en qué diba beneficiar a la ciudá.
Estes son les razones que nos mueven a ellaborar y pidir el sofitu a esti manifiestu. El Cascayu apurriónos la oportunidá de vivilu y disfrutalu y nun vamos renunciar a él.
POL DERECHU A UN XIXÓN PA VIVIR Y NON SOLO PA CONDUCIR.
¡Axúntate, y a defender lo que queremos.!
Contacto:
elmuroparalaspersonas@protonmail.com